Leikskólinn Akrar var formlega opnaður 12. janúar 2012. Á leikskólanum eru fjórar deildir, Mói, Lyng, Engi og Mýri.
Virkni og vellíðan eru grunngildi leikskólans. Vellíðan barna er höfð í fyrirrúmi og starfið skipulagt út frá þátttöku og virkni barnanna í öllu starfinu. Sköpun og læsi koma til með að skipa stóran sess í starfinu. Börnin læra af eigin reynslu með því að skynja námið á eigin hátt.
Við vinnum markvisst með Aðalnámskrá leikskóla og leggjum áherslu á að flétta leik barna inn í námið.
Mikilvægt er að efla sköpunarkraft, athafnagleði og forvitni barnsins, vekja áhuga þess og hvetja til gagnrýninnar hugsunar. Skapa þarf barninu uppeldisumhverfi sem örvar þroska þess á virkan hátt með eðlilegum og hæfilega erfiðum viðfangsefnum og möguleikum til sjálfstæðra rannsókna og athugana. Skapandi starf á að koma fram í öllum þáttum leikskólastarfsins, þar með talið myndsköpun, tónlist, leikræn tjáning og dans.
Við leggjum mikla áherslu á hreyfingu barna, bæði inni og úti og fara öll börn í skipulagðan íþróttatíma undir stjórn íþróttafræðings í hverri viku. Þar er markvisst unnið með ýmsa færni hjá börnunum. Þar að auki förum við með börnin í göngutúra út fyrir skólalóð og látum þau gera ýmsar skemmtilegar hreyfingar sem efla þau í leiðinni. Við leggjum áherslu á að efla sjálfsmynd nemenda og leyfum börnunum að hafa skoðanir á ýmsum þáttum er snúa að skólastarfinu. Við erum meðvituð um að raddir barnanna þurfa að fá að heyrast og á eldri deildunum eru haldnir deildafundir þar sem börnin fá að koma með sínar hugmyndir.
